早前因公事要到 窩打老道的中國銀行 辦事，郤親眼目賭一件令人搖頭嘆息的事．

當時大約下午三點幾四點，銀行內顧客唔多，大約只有十餘個客，銀行共有四個窗口做結存，從左面第一個至第三個是普通結存戶口 （第二個窗口是關了的，所以只有兩個窗口在做普通結存戶口），而最尾一個是“中銀理財”戶口，當時人客亦有秩序地分兩行排隊（左面一行排的是普通結存戶口大約有七至八人，而右邊一行是排“中銀理財”的客戶只有兩三人）．

本來咁樣安排好正常，但奇怪的事發生了，當一號窗做完個客之後，一號窗做開普通戶口個四眼仔郤揮手叫“中銀理財”那一行的客戶過去，當時排普通戶口條 Line的人己經非常愕然，排頭位那位小姐可能諗住只係一個半個無所謂啦，所以都無出聲，到三號窗那個女職員做完個客之後，應該到那位小姐啦，點知佢埋到去，那個女職員竟然叫那位小姐企番埋條 Line 度，話唔得閒幫佢做住，跟住就去招呼“中銀理財”那一行的客戶，這樣便變成三個窗口同時全部辦理“中銀理財”的客戶，但那一行其實只有兩三個客 ( 不過可能係大客呱，因為見佢哋成疊人民幣咁攞出嚟，有啲又話做幾多十萬咁 )，而普通戶口的一行郤有成七八個客在苦苦等後．

那位小姐再好修養都忍唔住啦，就問那位女職員點解你哋個窗口上面明明寫住係辦理普通結存戶口，那邊才是“中銀理財”戶口，點解輪到我都唔同我辦，反為同隔離條 Line 做先，佢哋排“中銀理財”條 Line ，唔係應該去番“中銀理財”個窗口，頭先一號窗係咁，我都算數無出聲，依家妳又係咁，唔該妳話我聽究竟邊個窗口先係幫我哋普通客戶服務，但那個女職員根本就唔答佢，只係話唔得閒幫佢做，叫佢番埋條 Line 再排過，結果連排在那位小姐後面位先生同再後面個老太都睇唔過眼，出聲同個女職員理論，跟住有個平頭四眼佬走埋嚟打圓場，可能係啲客戶主任之類，但當問到佢究竟邊個窗口係幫普通客戶服務，佢就無聲出，淨係識喺度笑，跟住有個排“中銀理財” 條 Line 著件花衫嘅呀嬸口多多咁插咀，竟然話自己排“中銀理財”條 Line，但係尖去人哋普通客戶個 Counter 係無錯嘅，可能佢持住自己財大氣粗，又或者係大陸啲文盲暴發戶啦，一味惡人先告狀，實行聲大夾惡，佢啲氣焰我係旁觀者都覺得好肉酸，結果咪兩條 Line 啲人嘈起上嚟囉！

其實我覺得罪魁禍首係嗰兩個銀行職員，因為中國銀行係第一國家銀行，身為其僱員，應該係受過高等教育嘅專業人事，點可能做出呢啲狗眼看人低，見高就拜見低就踩嘅奴才所為呢，可能佢哋會話都係按公司指示辦事，咁即係話呢間中國銀行淨係歡迎啲“中銀理財”啲大客，對啲小存戶愛理不理啦，咁無需開條普通客戶嘅隊畀人排啦，或者將所有Counter 改晒做“中銀理財”，無謂浪費大家時間，製造混亂．如果一間身為世界知名嘅中國銀行，竟然有咁嘅員工，有咁嘅不公平制度，身為中國人我會覺得可悲同羞恥，國家再辦幾多次奧運都無用啦，換湯唔換藥，個招牌再省得幾靚，都遮掩唔到呢啲醜態．

想唔到今時今日自喻為盛世嘅中國，仍然滿街暴發戶，到處狗奴才．